Польща пожадала Европску унію, жебы в повязаню з войнов на Україні запровадила односно Росії строгішы санкції, котры бы односили ся на ґаз, ропу, банкы, службы, інформачны технолоґії і земный а морьскый транспорт. Інформацію принесла в понедільок аґентура PAP. Польскый посол при ЕУ Анджей Садос высловив пожадавкы на пятніцьовій стрічі послів країн Унії, котра была заміряна на діскусію о найновішых санкчных пропозіціях Европской комісії. Польскый посол так само пропоновав санкції односно російскых воєньскых компаній і пропаґандістічных аґентур, а строгішы обмеджіня про російскый енерґетічный сектор, головно роповоды і ґазоводы. Польща хоче і вылучіня російскых банк із сістемы SWIFT.

(Медвідь, TASR)