Штатна Обща здравотна поіщовня вітать план дефіновати максімалны чекачі добы на операції. Подля выглашкы, котру приготовлює резорт здравотництва, бы ся на тоты, котры не суть акутны, чекало од семых до 365 днїв. ОЗП пояснила, же выглашка управлює і области, при котрых ся дотеперь довжка чекачой добы не слїдовала. ,,Саме задефінованя довжкы чекачіх доб предпокладать злїпшіня доступности конштітучной здравотной старостливости, кедже выглашка становлює верьхню граніцю чекачой добы,“ увела про TASR Івана Штефунова з оддїлїня комунікації ОЗП.  З інформацій штатной здравотной поіщовнї выходить, же пріемерна доба чеканя на операцію колїнного клубу у єй поіщенцїв є 400  днїв, на операцію бедрового клубу 357 днїв. Подля выглашкы бы так паціенты не мали чекати довгше як 365 днїв.

(TASR, Шутіова)