Україньскый презідент Володимир Зеленьскый у четверь позвав презідентку СР Зузану Чапутову на навщіву Україны. Інформовав о тім сам Зеленьскый в приспівку опублікованім на соціалній сїтї Twitter. ,,Кликав єм з презідентков Зузанов Чапутовов. Говорили сьме о покроку в повязаню з надобытём штатуту кандідатьской країны Европской унії, підпорили сьме наростаючі санкції. Діскутовали сьме і о довозі палива зо Словакії,“ увів Зеленьскый на Twitteri. ,,Подяковав єм ся за гуманітарну і обранну поміч а позвав єм ю на Україну,“ закончів. Чапутова тот вікенд в діскусній релації RTVS Суботнї діалоґы увела, же зважує выбер конкретного терміну навщівы Україны з тым, же евідує позваня од україньского презідента. ,,Хочу там прийти з конкретным цїлём або заміром. Не хочу то брати як войнову турістіку,“ підчеркла в релації. Така навщіва є подля нёй способ выражіня підпоры Українї.

(TASR, Шутіова)