Посланецька сеймовня чеського парламенту схвалила у четверь мандат, котрый уможнить аж 650 членам армады ЧР пособити на Словакії до 30. юна 2023. TASR о тім інформовала на основі выражіня чеського міністерства обороны. Армадї ЧР по схвалїню мандату парламентом уж ніч не бранить зачати під своїм велїнём будовати многонародну боёву ґрупу NATO, конштатує резорт обороны. Вытворіня боёвой ґрупы на Словакії є частёв намагы посилнити выходне крыло Североатлантічной аліанції в реакції на прудке згоршіня безпечностной сітуації способлене російсков інвазіёв на Україну. NATO зато вырїшыло о приправі зряджіня сталой притомности на Словакії, в Мадярьску, Румунії і Булгарії.

(TASR, Шутіова)