Єдна з найнавщівлянїшых подїй під Татрами, фестівал Европске народне ремесло, ся по перерві вынученій пандеміёв коронавірусу зась одбуде. Зась так понукне простор на презентацію творьбы ремеселників. Інформовав о тім на соціалній сїтї пріматор Ян Ференчак. ,,Наперек тяжкій сітуації, котра перебывать на Українї, орґанізачный выбор вырїшыв по двойрочній перерві зробити 30. рочник той выглядаваной културно-сполоченьской подїї. Детаілы іщі доладюєме а будеме о них вшыткых вчас інформовати,“ увів пріматор. Додав, же з боку ремеселників є о европске людове ремесло інтерес. Лїтнїй фестівал каждый рік навщівлять тісячі людей, окрем продая выробків і укажок самого ремесла суть ёго частёв концерты ці театралны представлїня на градї.

(TASR, Шутіова)