Вчера 11-го януара ся у вечірніх годинах одбыло онлайн засіданя членів Выконного выбору і Дозорной рады Русиньской оброды на Словеньску, котре скликав і вів председа орґанізації Мартін Караш. Председа інформовав членів о актівітах орґанізації почас пандемічного періоду в 2021-ім році, o aктуалній сітуації в русиньскім народнім русі, як і о ставі минулорічных проєктів і вызвах на рік 2022. Членове высоко позітівно оцінили минулорічну кампань перед списованьом жытельства, до котрой ся запоїли нелем вшыткы русиньскы орґанізації і інштітуції на Словеньску, але і іншы штаты, де жыють Русины. О выслідных чіслах ставу народностных меншын, бы подля слов Караша, мав Штатістічный уряд інформовати до конця януара т. р. О приправах і реалізації кампані, але і добрій сполупраці русиньскых орґанізацій інформовав на засіданю і Петро Штефаняк, председа Округлого стола Русинів на Словеньску. (А. Кузмякова)