Підпорити усвідомліня обывателів міста Гуменне о културных і природных памятках з його історії і розвоя, самосправа вырішыла вытворити евіденцію містьскых памяток. Список першых семох схвалили містьскы посланці на своїм децембровім засіданю. Найстаршов на списку є бароково-класіцістічный єднолодьовый ґрекокатолицькый фарьскый Храм Успенія Пресвятой Богородіці з року 1767. Далшыма суть – зображіня хрестной драгы в семох здвоєных капліцях калварії, квартельовый дім на Станічній уліці, де в пивнічнім стропі суть замурованы шыны з роком выробы 1888, соха св. Яна Непомуцького на Намістю слободы, 150-рочне цінне двойлалочне ґінко, котре росте в Парку міру, памятнык вдякы Червеній армаді і фолклорный колектів Калина заснованый в році 1976. (TASR, Pkf)