На Любовняньскім граді лем перед пару місяцями сприступнили навщівникам зреконштруованый палац Любомірьскых а уж готують обнову далшых частей.  Музею в Старій Любовні ся подарило здобыти 850.000 евр на оправу северовыходных мурів, котры суть в гаварійнім ставі. Частьов проєкту є і презентація градных ремесел, вытворіня соколярьского двора і реґуларна тзв. Авес терапія. Проєктову документацію уж схвалив Памятковый уряд СР. Музей так минулый тыждень пожадав о ставебне поволіня, по котрім выголосить верейне обстараня на додавателя ставебной роботы. За словами директора Любовняньского музея Далібора Мікуліка, реалізація проєкту бы мала тырвати до 2024-го року. (TASR, Pkf)