Одкликованя міністра внутрішніх справ Романа Мікулца ся знова пересувать на септемброве рядне засіданя парламенту. В салі Народной рады Словацькой републікы ани по перерві днесь не было доста депутатів, парламент так не быв узнесіняспособный. Опозіція хотіла міністра одкликовати знова про веце причін. Крітікує го за сітуацію в резорті і поліції, за підорзріня з корупції і за то, же ся мав стрічати з членом братіславской ґрупы такачовых в його квартелі, де мали обговорити коордінацію выповідей. Міністер Мікулец вшыткы обвиніня дементує.

(Медвідь, TASR)