Турістічный історічный влак, на котрый місто Меджілабірці чекало о пару місяців довше, як было плановане, абсолвовав у пятніцю свою першу офіціалну їзду містом. В день недожытых 93-іх народенин Енді Варгола чекав на меджілабірьскій автобусовій станіці турістічный влак Andy Express на приход сезенного влаку Швейк з Польщі. Пріматор Владислав Вышньовскый вірить, же нова атракція притягне турістів і на спознаваня шыршой околіці міста. Першы їзды турістічного влаку будуть 50-минутовы і поведуть з Меджілаборець до Калинова, пізніше бы мав ходити влак і до Габуры ці на Монастырь в Краснім Броді. Влак є выслідком словацько-польского проєкту в співпраці з партнерьскым містом Коросно, і вытраты на нього были 200 тісяч евр.

(Медвідь, TASR)