Славностнов інавґураціов зачне днесь свій функчный період новый презідент Сполученых штатів америцькых, демократ Йое Біден, і вєдно з ним нова америцька віцепрезідентка Камала Гаррісова. Подля першого абзацу 20. додатку америцькой уставы ся функчный період америцького презідента зачінать днесь о 18.00 нашого часу. Інавґурація обсягує славностне зложіня присягы. Новый презідент подля традиції складать свою присягу до рук председы Найвысшого суду США. Днешню плановану інавґурацію комплікують безпечностны обавы по атаку підпорователів одходжаючого презідента Доналда Трумпа на будову Капітолу, резіденції америцького конґресу, зо 6-го януаря. З даной причіны в главнім місті розмістили тісячі членів Народной ґарды. Трумп уж скорше ознамив, же на інавґурації небуде брати участь. (TASR, Pkf)