Найпізніше од слідуючого вікенду буде каждый тыждень далше масівне тестованя. Першый вікенд, котрого ся то буде дотуляти, буде у вшыткых окресах Словакії. По понедільковім засіданю влады о тім інформовав премєр Іґор Матовіч. Тестованя ся в даных окресах мають повторяти довтогды, покля інціденція не знижыть ся під 0,5 процента. Подля Матовіча є цільом приготовити перетестованя так, жебы было штонайплынуліше і не повторяли ся хыбы з осінньой акції цілословацького тестованя. Самосправы в найвеце постиженых реґіонах, котры суть способны зорґанізовати тестованя уж тот вікенд, премєр вызвав, жебы так зробили. Абсолвованя тесту і неґатівный резултат має быти єдночасно условієм, жебы хосновати выняток зо заказу выходжіня, включно подорожіня за роботов ці можности іти до природы.

(Медвідь, TASR)