Далше коло тестованя на хвороту COVID-19 на Словакії бы ся мало дотуляти лем коло 500 сел і 5-ох меншых міст, не цілых окресів, ці цілой країны. Проходити бы мало через вікенд, 21-го і 22-го новембра. Інформовав о тім премєр Іґор Матовіч по понедільковім засіданю Централного крізового штабу. Як інформовав Матовіч, дав пропозіцію, жебы ся высловно тестовали лем села і міста, де інціденція была высша як єдно проценто. За його словами є потрібне, жебы собі і вояци і остатні професії, котры брали участь на дотеперішнім забезпечованю цілодержавного тестованя, оддыхли. Додав, же Міністерство внутрішніх справ было повірене накупліньом антіґеновых тестів і охранных средств потрібных на тестованя. О припаднім увольнованю рештрікцій ся подля премєра мож бавити аж втогды, кедь сімдньовый медіан знижыть ся під чісло 500. Матовіч так само повів, же епідеміолоґове рекомендують зиму звладнути локдавнами. Но подля премєра ся вказало, же тестованя антіґеновыма тестами може фунґовати.

(Медвідь, TASR)