Історія Православной церькви на Словакії до 1948-го року презентує выстава з назвов  З історії православной церькви на Словакії – Утверди, Боже, котру одкрыли в просторах Словацького народного музея – Музея русиньской културы в Пряшові. Навщівници собі можуть попозерати богослужобны книгы із 17-го аж 19-го столітя, богослужобны ризы вызначных церьковных діятелів, іконы зо северовыходной Словакії ці части іконостасу із днесь уж неіснуючого села Руське в окресі Снина. Меджі богослужобныма ризами суть выставлены і ризы, котры належали російскому реліґійному філозофови, поетови, теолоґови і драматурґови Владимірови Соловєвови, котрый быв душпастырьом у селі Лютина в окресі Сабінов. Выстава потырвать до року 2022.   (Pkf)