Председа Народной рады Словацькой републікы Борис Коллар одышов у віторок рано на свою першу офіціалну загранічну путь. Тота вже традічно веде до Чеськой републікы. Допроводить го і підпредседа парламенту Юрай Шеліґа а членове делеґації. В Празі днесь приймуть Коллара председове обидвох комор парламенту Мілош Вістырчіл і Радек Вондрачек. Окрім того є напланова і стріча з премєром Андрейом Бабішом а презідентом Мілошом Земаном. Окрім офіціалных стріч собі шеф парламенту припомяне і Йозефа Ґабчіка, Яна Кубіша і далшых, котры брали участь на операції Антропоід і зробили атентат на рішского протектора Райнгарда Гайдріха. Коллар положыть квіткы ку Народному памятнику героїв гайдріхіады. Стрітить ся і з краянами, котры жыють в Чеській републіці.

(Медвідь, TASR)