Потравины, дроґерії, трафікы ці обходы з кормивом про звірята будуть все в неділю заперты. Буде то санітарьный день і день, коли мають одпочінути робітници. Про сеніорів над 65 років ся встановить час на накупованя од 9.00 до 12.00 годины. Днесь то оголосив премєр Іґор Матовіч на пресконференції. На вступі до обходів ся має подля слов председы влады контрольовати тілесна теплота заказників, котры входять, на чолі. Покля ся не будуть в обходах дотримовати выголошены гігєнічны і орґанізачны наряджіня, штат може тот обход заперти аж до кінця карантены. Почас епідеміолоґічной сітуації суть дочасно зрушены безплатны влакы про штудентів. Влада тым хоче досягнути, жебы молоды люди не подорожыли несмыселно, але были дома і жебы так не компліковали сітуацію. Влада прияла цілково 40 новых наряджінь. Повинне є і носити маску будьде вонка. Премєр на пресконференції повів, же буде жадати од самосправ, жебы забезпечовали накупы про сеніорів, котры суть найвеце огрожены. В пондільок прибыло 19 новых інфікованых, цілково є їх на Словакії 204.

(Медвідь, TASR)