Днесь, в понеділок 20-го януара, пополідне о півдругій годині, одбуде ся в просторах Театру Александра Духновіча в Пряшові перше тогорічне засіданя Выконного выбору і Дозорной рады Русиньской оброды на Словеньску, котре скликав председа орґанізації Мартін Караш. Членів очекує богатый проґрам – обговорити святкуваня многых тогорічных юбілеїв, як 30-та річніця діятельства першой пореволучной русиньской орґанізації – Русиньска оброда на Словеньску, 25 років од кодіфікації русиньского літературного языка, юбілей недожытых 80-ых народенин Василя Турока-Гетеша, першого председу Оброды і Світового конґресу Русинів, приготовліня 15-го Сейму орґанізації і много іншых културных подій і централных конкурзів. (А. Кузмякова)