Омбудсманка Марія Патакійова не є согласна з 50-дньовым мораторійом про волебны баданя. Новелізацію, котра продовжує мораторіюм із 14 на 50 днів, бере за незгодну з веце основныма правами. Свою фахову позіцію дала в понедільок і Конштітучному суду в повязаню з пропозіційов презіденткы Словацькой републікы Зузаны Чапутовой на зачатя процесу о згоді правных приписів. Патакійова вказала на веце спорных частей закона, котры подля ньой порушують основны права і свободы. Підкреслила, же знаня волебных бадань має про воличів ключове значіня і повнинносьтов державы подля ньой мусить быти уможньовати штонайшыршый приступ ку ключовым або хосенным інформаціям.

(Медвідь, TASR)