Председа влады Петер Пеллеґріні стоїть за тым, же своїм выступом на конференції поліцайтів не куповав їх голосы. В реакції на слова председы OĽaNO Іґора Матовіча повів, же ішло о публічный прояв, значіть його слова не были тайны. За словами премєра ішло о публічну стрічу з поліцайныма профсоюзами з цілой Словакії, де было веце медій і каждый міг робити запис. Пеллеґріні на записі бісідує о приплатках про поліцайтів, гасічів і членів гірьской службы в сумі 120 евр, респектівно 160 евр про поліцайтів у Братіславскім і Тырнавскім краю. „Є лоґічне, же кедь ся нас позвідали, де мають ґаранцію, же їм хтось на тоты особны приплаткы не сягне, моя опдовідь была ясна і зрозуміла, же покля єм председа влады, можу ґарантовати, же їм нихто на приплаткы не сягне. Што буде по вольбах, тото ґарантовати не знам,“ повів Пеллеґріні. Рішіня о піднятю особного приплатку подля премєровых слов не є єдноразове, має платити довгодобо, вже од першого децембра того року.

(Медвідь, TASR)