Татраньскый ледовый дом, котрый уж традічно патрить ку сімболам зимы в реґіонї, у четверь семый раз отворили на Гребєнку в Старім Смоковцю. ,,Отворінём унікатной атракції ся зачала нова зимна сезона. Містны орґанізації путёвого руху і готелєры уж суть приготовлены на підвышованя кількости турістів. Унікатна атракція є тот рік іншпірована Катедралов Нотре- Даме в Паріжу. Вырїшыли сьме так крізь пожар, котрый тоту памятку постигнув на ярь.  Взникала під руками головного ставітеля Адама Бакоша, котрый на ню вывжыв 225 тон леду,“  увела выконна директорка Областной орґанізації путёвого руху Реґіон Высокы Татры Луція Блашкова з тым, же умелецькый твір лежыть в надморьскій вышцї 1285 метрів а каждорочнї приманить домашнїх і загранічных турістів.

(Шутіова, TASR)