Із нагоды 1400-річніці од смерти св. Йоана Милосиового в православнім Катедралнім соборі Успенія Пресвятой Богородіці в Кошыцях, котрый є присвяченый і мену спомянутого святого, в неділю 10-го новембра проходила торжественна архієрейска літурґія. Окрім домашнього михалівско-кошыцького архієпіскопа Высокопреосвященого Ґеорґія служыли єй і владыкове із заграніча – Высокопреосвященый Амфілохіє, чорногірьско-приморскый метрополіта із Сербской православной церькви і Высокопреосвященый Антоній, метрополіта бориспольскый і броварьскый з Україньской православной церькви з благословліньом метрополіты Онуфрія. В тот самый день вечур архієреї навщівили місце, на котрім має быти збудованый Монастырь св. Василія Острожского – село Бенятина, де посвятили його основный камінь. Метрополіта Амфілохіє в приговорі участным повів, же тот монастырь буде представльовати карпатьскый Остроґ і єдночасно спомянув, же посвячіньом основного каміня Василій Острожскый якбы вертав ся до свойой отцюзнины, бо за словами метрополіты його предкове і предкове вшыткых Сербів походили якраз із Карпатьской области.

(Медвідь)