Росія у четверь высловила пожадавку, жебы Сірію опустили вшыткы америцькы вояци, котры ся там іщі находять. Притомность Споєных штатів у войнов знищенім штатї, Москва означіла за окупачну силу. Інформовала о тім аґентура DPA. ,,Покы іде о притомность америцькых вояків в Сірії, наша позіція є барз добрі знама. В Сірії є леґітімна лем притомность російскых сил позваных сірьсков владов,” повів говорця Кремля Дмітрій Песков. Америцькый презідент Доналд Трамп, котрый нарядив часточну евакуацію америцькых єдноток зо Сірії, в середу в Білїм домі повів, же в Сірії зостане лем ,,мала кількость америцькых вояків”, котрых задачов буде головно охорона тамтышнїх ропных полей.

(Шутіова, TASR)