Уповномоченый влады про народностны меншыны Ласло Буковскый про TASR повів, же што до языків народностных меншын, мусять вшыткы орґаны самосправы інформовати своїх жытелів, якы суть їх языковы права. Повів то 14-го октобра по робочій стрічі зо старостами меншыновых сел в окресі Meджілабірці. Уповномоченый окоментовав і выслідкы тогорічной Справы о аплікованю языкового закона до практікы з тым, же холем дакус суть ліпшы як перед двома роками. „Обще можеме повісти, же села і орґаны верейной справы затля не зрозуміли в позітівнім смыслі слова, же є ту закон, котрый платить 20 років, а при аплікації, нажаль, сьме десь в половині.“ Буковскый додав, же інформації о дотримованю языкового закона бы мали самосправы публіковати на урядных таблах, або на добрі видительнім місці в уряді ці перед урядом, або на вебсайті. Подля його слов майже 50 процент сел без розділу на окремы меншыновы языкы тото не дотримує.

(Медвідь, TASR)