Посланці з руху OĽaNO хочуть зрушыти выплачуваня заробітків посланцям по скінчіню їх мандату. SaS пропонує зрушыти його лем в припаді, як посланцьові скінчить мандат з причины правоплатного одсуджіня за карный поступок. До Народной рады СР дали пропозицію на зміну закона о заробітковім одношіню дакотрых уставных представителів. Як посланець небуде по вольбах знова выбраный до парламенту і буде мати проблем найти собі нову роботу, може ся за інформаціями OĽaNO претендувати о поміч на уряді праці. “По скінчіню законных условій буде єхпосланцові в часі шестьох місяців выплачована підпора в безробітности у вышкі одведженого од його попереднього надсереднього заробітку посланця, котрый быв од януаря 2019-го року звышеный о скоро 30 процентів,“ сконштатували предкладателі. (TASR, Pkf)