Депутаты Нижньой сеймовні брітаньского парламенту у віторок ани на другый раз не схвалили пропозіцію премєра Бориса Джонсона на выписаня передчасных волеб на 15-го октобра. Інформовала о тім телевізія BBC. За новы парламентны вольбы голосовало 293 депутатів, Джонсон на схваліня пропозіції потребовав двотретинову векшыну, значіть 434 голосів. Парламент має теперь перерву, котру собі премєр подля крітіків вымусив, жебы му депутаты не боронили зробити брексіт без договору. Джонсон тырвать на тім, же Великобрітанія мусить одыйти з Унії 31-го октобра, ці з договором, або без нього. З тым не є согласна опозіція ани часть депутатів його Конзерватівной партії. Премєр і перед голосованьом о вольбах повів, же не буде жадати о одклад брексіту і наперек закону, котрый го тым обовязує, і котрый быв схваленый минувшый тыждень.

(Медвідь, TASR)