Председа коалічной партії Most-Híd Бела Буґар не выцофать з пожадавкы волити кандідатів на конштітучных судців у пленумі публічно. В розговорі про TASR повів, же ся не зохабить притиснути коалічныма партнерами до іншого договору. Шеф SNS Андрей Данко так само недавно потвердив, же буде просаджовати публічне голосованя. Smer-SD і надалше тырвать на тайній вольбі. Депутаты будуть знова волити кандідатів на судців Конштітучного суду Словацькой републікы на септембровім засіданю. Затля ся жаден кандідат не приголосив. „Кебы сьме не пересвідчіли Smer-SD, і так перейде в парламенті публічна вольба. Бо то значіть, же буде голосовати SNS і мы а думам, же опозіція так само. І кебы на то SNS не пристала, і так бы сьме підпорили лем публічну вольбу, бо я уж зодповідный за неуспіх при вольбах конштітучных судців не хочу быти,“ повів Буґар про аґентуру. Конштітучный суд має теперь сім із 13-ох судців. Презідентка Зузана Чапутова повіла, же конштітучных судців выменує, аж кедь дістане повну кількость кандідатів.

(Медвідь, TASR)