Словакія підтримує выникнутя такзваной европской мінімалной мзды. Потвердив то міністер роботы Ян Ріхтер. Їй запроваджіня є частьов проґраму новой шефкы Европской комісії Урсулы вон дер Леєновой. Позіція Словакії є подля Ріхтера єднозначна, з тым, же затля ся не бісідує о конкретній сумі. Правдоподобно бы мінімалный заробіток не мав быти єднакый на цілім контіненті. Леєнова повіла, же бы ся мали вытворити рамкы, котры бы решпектовали різніці на окремых робочіх рынках. В минулости ся бісідовало о 60-ох процентах середньой мзды, котры бы творили мінімалну европску мзду в державі. „Мали бы сьме собі задефіновати і повісти, якым способом ся ку тым 60-ом процентам допрацуєме. В якім часовім періоді. Новый взорець може быти 60 процент. Треба видіти, же европску мінімалну мзду спомянула і нова предсидателька Европской комісії у своїм выступліню, кедь пересвідчовала Европскый парламент,“ повів міністер. Подля міністра Ріхтера то буде важна тема слідуючого функчного періоду Европского парламенту. О тій проблематіці бы хотів міністер говорити і з німецькым а чеськым резортом роботы слідуючій місяць. Ріхтер бы хотів апеловати на европскы державы, жебы чімскоріше ся мінімална европска мзда стала частьов европской леґіслатівы.

(Медвідь, TASR)