Влада Словацькой републикы абсолвовала далше із своїх выїздовых засідань, тотраз в Стропкові. Кабінет премєра Петра Пеллеґрініго прияв акчный план того окресу, котрый є так само меджі найменше розвитыма окресами на Словакії. Інформували аґентуры SITA i TASR. В найблизшых пятьох роках хоче влада в окресі вытворити 261 робочіх місць. Влада на своїм засіданю знова роздавала. До окресу Стропків піде на підпору реґіону 1,178 міліона евр. Підпореных было понад 70 проєктів сел, но і школ, обчаньскых здружінь, шпортовых команд і церьквей. Найвеццей грошей зістане в окреснім місті, де ся інвестує до закупліня екстерных дефібрілаторів. Поліпшыли собі і дакотры села. Буківці дістануть 30 тісяч евр на закупліня конвектоматів і умывачкы ґратів про основну і матерьску школу. Брезніця дістала із сел рекордну суму 32 тісяч на закупліня заряджіня до сільской і школской кухні. Фіначны средства підуть і до Токаїку. Грошы были приділены на реконштрукцію просторів Музею Токаїцькой траґедії. Вышня Ольшава дістала од словацькой влады фінанчну дотацію на будованя православной церькви. Міньовці будуть за приділеныма грошамі оправлювати стріху на сільскім уряді. Премєр Петер Пеллеґріні на пресконференції по засіданю влады інформував, же влада приобіцяла і дальшых 41 міліонів евр на збудованя обхвату Стропкова. (Петро Медвідь)