Будуча презідентка Зузана Чапутова представила шпеціалный одборный порадный орґан про область меншын, котрый вытворила. Чапутова написала, же уж в часі кампанії говорила, же хоче быти презідентоков вшыткых людей. „Прото закладам нову традіцію і вырішыла єм призвати до сполупраці і заступників народностных меншын і одборничку про область новых меншын і меншыновых прав,“ написала Чапутова на своїм фейсбуковім профілі. З ехпертным порадным выбором ся буде реґулярно стрічавати. Твердить, же про єй роботу є важне, абы розуміла сітуації, потребам і проблемом, котрым протівостоять обывателі і обывателькы народностных і новых меншын на Словакії. Мадярьску меншыну буде заступовати Ілона Немет з Высокой школы вытворного уміня і діректор Форум інштитуту про дослідженя меншын Атіла Сімон. Діректорка Уставу русиньского языка і културы Пряшівской універзіты в Пряшові Анна Плішкова і говорця округлого стола Русинів Словеньска Петро Медвідь будуть радити в області русиньской меншыны. Ромску меншыну заступлять ведуча Інштитуту ромонолоґічных штудій Універзіты Конштантіна Філозофа в Нітрі Юріна Руснакова і Віктор Теру з Ромского наукового фонду. Остатны народностны меншыны і новы меншыны буде репрезентувати діректорка Центра про дослідженя етніціты і културы Елена Ґалова Кріґлеров. (SITA, Pkf)