В суботу ся з нагоды Дня пожарників – свята св. Флоріяна і 74. выроча скінченя другой світовой войны одбыв 26. річник выступу на гору Маковиця в окресі Свидник. На акції брали участь добровольны пожарникы зо Свидника, Стропкова, але і з далшых часті Словакії ці загранича. „Першый выступ ся одбыв 8. мая 1994. Його участниці вырішыли, же в даній акції будуть продовжувати і о рік. Часом взникла думка, абы на горі стояла соха св. Флоріяна, кідже ішло о ославы того патрона. Тото ся стало реалітов  28. юна 1998, “ повіла про пресаґентуру ТАСР секретарька орґанізації Добровольной пожарной охороны СР про окресы Стропків і Свидник Павліна Кретова. Проґрам, так як каждый рік ся зачав богослужіньом – молебеном, прівітаням гості, выступлінями участників і славностным кладжіньом букетів квітів к сохі  св. Флоріяна. „Главным проґрамом было запаліня ватры, котру каждый рік приправує іншый добровольницькый пожарный корпус. Додатковым проґрамом были і шпортовы змаганя про дітей і дорослых і културный проґрам. В тім року нехыбала і томбола, то значіть многы участниці одыйшли домів і з інтересныма цінами,“ приближыла Кретова. (ТАСР, Пкф)