Творчість Ендіго Варгола приближыть выстава з назвом „Я походжу одникады“, котру одкрыють завтра о 16.00 годині в просторах Шарішской Ґалерії в Пряшові. За словами куратора Музеа модерного уміня Андіго Варгола в Меджілабірцях Міхала Біцка выстава, котра несе назву Варголовго выслову, є концепчні заміряна на ближше познаня Варгола через істы артефакты, документы, скорішы діла умелця, вплив мамы на формованя його умелецького і філозофічного погляду на жывот, уміня і світ. „Цільом кураторів проєкту Варгол Тур, котрого частьов є і выставав, є проба о одповідь на высловліня, котрым Варгол якбыто нароком таїв своє походженя, но здругого боку провоковав к гледаню познаня реалного походжіня,“ пояснив Біцко. Выстава буде одкрыта в Шарішскій ґалерії в Пряшові до 30. юна. (ТАСР, Пкф)