Комік Володимір Зеленьскый выграв у недільняйшім другім колі презідентьскых выборів на Україні, в котрім ясно поразив урядуючого презідента Петра Порошенка. По зрахованю 99-ох процент голосів выходять резултаты, же Зеленьскый здобыв 73,22 процента голосів, сучасный презідент лем 24,46. Порошенко прогру признав і оголосив, же з політікы не одходить, буде робити презідентови опозіцію і о пять років хоче знова кандідовати на посаду головы державы. Його партія Блок Петра Порошенка є найміцнішым політічным субєктом у Верьховній раді Україны. Новозволеный презідент приобіцяв зміны на державных посадах, в основных областях хоче продовжовати в політіці свого попередника. Голосить ся ку мірному процесу на Україні, є за вступ до Европской унії, но о членстві в НАТО бы подля нього мав вырішыти референдум.

(Медвідь, TASR)