Брітаньска конзерватівна преміерка Тереза Мeйова ся у четверь накурто стрітила з водцём опозічной лабоурістічной страны Джеремім Корбіном. Обідвоє лідры ся догодли, же рокованя о компромісі схвалїня предбежного договору о одходї Брітанії з ЕУ в брітаньскім парламенті, котре обидві страны ведуть, будуть продовжовати. Інформовала о тім справодайска телевізія Sky News. ,, Джеремі Корбін а Тереза Мейова ся днесь курто стрітли в парламенті. Обидві страны ся догодли, же будуть продовжовати в діскусіях в усилю досягнути засадный покрок в гледаню компромісного плану, “ уводить ся у выголошіню Лабоурістічной страны. Брітаньска преміерка ся з водцём опозіції стрітила по тім, як посланцїв Спіднёй сеймовни брітаньского парламенту інформовала о выслїдкох міморядного саміту ЕУ, котрый ся одбыв в середу в Бруселї. Представітелї 27 штатів Унії на нім были согласны з одкладом одходу Брітанії з ЕУ до 31. октобра 2019 з тым, же Мейова довтоды найде в Спідній сеймовни достаточну підпору про договор о брексітї, котру єй влада выроковала з Бруселом.

(TASR, Шутіова)