Міністерство обороны Словацькой републікы не буде веце брати участь на їднанях о фінанчній помочі в рамках Договору о оборонній співпраці зо Споєныма штатами Америкы. Подля резорту бы приятя помочі огорзило сувереніту Словакії. Інформовала о тім говоркына міністерства Данка Цапакова. Резорт діпломації тото рішаня Міністерства обороны неспосдівало. Як інформовало пресове одділіня Міністерства загранічных діл і европскых справ, оборона ку тому приступила без конзултацій, ці їднань в Безпечностній раді державы або на уровни коаліції. Озвала ся вже і коалічна партія Most-Híd, котра буде жадати поясніня, чом были неуспішны їднаня о фінанчній помочі од партнера з НАТО. Авізовала то говоркыня партії Клара Дєбнар.

(Медвідь, TASR)