Председа влады Петер Пелеґріні (Smer-SD) бы ся мав в Білім домі стрїтити з презідентом США Доналдом Трампом. Інформує о тім денник Правда на своїм сайтї з тым, же приправа премєровой офіціалной навштївы США є ,,на добрій пути“. Термін стрічі заты подля денника Правда становленый не є. ,,Може то быти на осінь того року, затоже на ярь 2020 уж будуть вольбы до Народной рады СР,“ конштатовав про денник здрой зо Словакії. ,,Америцька адміністратіва мать інтерес о пряму стрічу з лідрами споєнецькых членьскых країн НАТО. Платить то і о вашім штатї. Тема Пелеґрініго навщівы є в штадію покрочілых конзултації,“ реаґовав не менованый представитель Вoшінґтону. Спомеджі словацькых лідрів ся остатнїй раз дістав до Білого дому бывшый премєр Роберт Фіцо (Smer-SD).

(TASR, Шутіова)