В суботу 2-го марца 2019-го року в містьскій шпортовій салі Mier в Бардейові проходило фіналове змаганя VI. річника фотбалового турнаю Rusyn Cup о путовный Русиньскый Погар.

Цінна русиньскы шпортова трофей по році в руках ТЄ Дуява Хмельова одходить за новыма переможцями до Хорватії. На фіналовых змаганях брало участь 16 команд із трьох держав. Цілково ся тот рік до кваліфікачных змагань, котры проходили в Братіславі, Старій Любовні, Свіднику, Михалівцях і Руськім Керестурі, залучіло 35 команд. Резултаты їх взаємных змагань вырішыли о тім, же меджі штири найліпшы команды ся дістали ТЄ Дуява Хмельова, НК Русин Міклушевці, Pusinky і Свідник. В змаганю о третє місце наступли проти собі ТЄ Дуява Хмельова і Pusinky, і по єднозначнім резултаті 6:0 ся меджі першы три команды дісталі минулорішны переможці Хмелівчане. Фіналове змаганя о перше місце належало командам НК Русин Міклушевці і Свідник. Міклушевці так самодекласовали Свідничанів 5:1, чім собі Русины із Хорватії забезпечіли цілкову перемогу на VI. річнику Rusyn Cup, і путовный Русиньскый погар так взяли зо собов. Окрім команд были на турнаї оцінены і окремы грачі в катеґоріях найліпшый стрілець, найліпшый бранкарь (воротарь) і найліпшый грач турнаю. Тітул найліпшого стрілця собі одніс грач команды Свідник Михал Южанін. Йосип Штырбо із НК Русн Міклушевці быв выголошеный за найліпшого бранкаря і цілково найліпшым грачомтогорічного турнаю став Матєй Варян із ТЄ Дуява Хмельова. (Лем.фм, Пкф)