Днесь по 17-ій годині бы парламент мав выберати кандідатів на судців Конштітучного суду. Вчера ся за публічну вольбу высловили і дві коалічны партії – Most-Híd і SNS, котры тым реаґовали на іформації же найміцніша коалічна партія SMER-SD їднала з фашістічнов партійов Маріяна Котлебы, жебы забезпечіти зволіня Роберта Фіца. SMER-SD притім довгододобо тискав на то, жебы вольба была тайна і арґументовав тым, же то штось, што ту маєме вдяка демокрації. На сітуацію реаґовав і презідент Андрей Кіска. „Очекую єдно, же мі парламент выбере 18 якостных кандідатів на Конштітучный суд. То моя єдина пожадавка, жебы то были досправды фахово здатны і морално якостны люди. З погляду того, якы інформації єм дістав і якы різны закулисны їднаня ся ведуть думам, же в тій сітуації є публічна вольба правилнов вольбов,“ повів презідент. Депутаты мають із 39-ох номінантів выбрати 18-ох кандідатів, котрых запропонують презідентови. Тот з них має выменовати 9-ох, якы 12 років будуть судцями на Конштітучнім суді.

(TASR, Медвідь)