Холодна погода є тяжка про каждого, главні про дітей, котрых родичі суть в біді. Місто Пряшів зареаґовало і давать такым дітям задармо тепле їдло. Інформувала о тім пряшівська радниця. “Дітям, котрых родичі ся достали до біды і котрых часто стрічаваме в скромнім облечіню на улиці ці в близькості накупных центер, сьме вчасі холодных днів забезпечіли бесплатне подаваня теплой поливкы, хліба, теплого чаю в їдальні Територіалного сполку Словацького червеного хреста,“ інформувала о тім Марія Гуменікова, ведуча одбору соціалных служб Містьского уряду в Пряшові. Територіалный сполок Червеного хреста ся находить на Ярковій улиці 45. Згадану поміч міста можуть тоты діти выужыти до кінця фенруара в часі робочіх днів од 13.00 до 14.00 год. О тій помочі ся діти і люде в біді дознавають за словами радниці од робітників одбору соціалных справ, містьскых поліцайтів і дальшых людей, котры ся з нима стрічавають.