Пряшівскый самосправный край робить на розшыріню водоводной і каналізачной сіті в окресі Снина. Актуалні на выпрацюваня штудії про даный замірь планує крайска самосправа  з тогорочного бютжету выділити 260.000 евр. Скоро половину з даных фінанцій бы мав притім рефундовати штат. Як про наше радіо Русин.фм председа Пряшівского самосправного края Мілан Маєрскый повів, „окрес Снина рішыть основный проблем. 28 з 34 сел немать даны штандартны службы споєны зо засобуваням воды і немать даны ниякы службы повязаны з одваджаням одпадовых вод. Іде звекша о маленькы села, котры суть розсіяны і котрым хочеме помочі. Прото сьме пожадали влады о внесок на штудію зреалізовательності даного замірю, абы сьме на плануване выбудованя потрібной інфраштруктуры могли выужыти і европскыфінанчны средства. Тішыть нас, же сьме ся з боку влады стрітли з позитивнов реакційов.“