Презідент Словакії Андрей Кіска у віторок выменовав до функції 15 новых судців без часового обмеджіня. Декреты собі перевзяли судцьове, котры будуть діяти векшынов на окресных судах. Презідент судцям заґратуловав і припомянув їм, же з їх выроками будуть повязаны высокы очекованя, бо Словакія терпить крізов довіры людей в справедливость. „Очекую, а нелем я, але головно нашы гражданы, же вашы будучі вырокы будуть законны, тяжко спохыбнительны і справедливы. Же будуть чітательны, зрозумілы, і в єднакій і подобній сітуації ся будуть дати очековати. І може даколи і одважны, покля собі то вызначны обставины або публічный інтерес выжадують,“ повів презідент. Як далше говорив презідент, очекованя будуть повязаны і зо способностьов судців і приготовленостьов меріторічно, почливо і терпезливо комуніковати з верейностьов.(Медвідь, TASR)