Лемко Союз, еміґраційна орґанізація в Споєных штатох америцькых (США) 4. авґуста зорґанізувала Талерговскый день памяті, якый ся одбыв в Гіґані (Higganum) в штаті Конектікет в США. В короткым проґрамі одбыло ся насамый перед богослужіня, а пак спільне припомянутя собі жертв єдного з ґеноцидів русиньского народа. Талерговскій день одбывать ся фурт в першый вікенд місяця авґуст. Національна память серед американьскых Русинів все была важна, будувала в них націоналне самоусвідомліня і звязок зо Старым краём. В тот день орґанізаторы собі припомянули десяткы тисячі хлопів, жен і діти, котры были пронаслідуваны, стратили здоровля або вмерли в австрійскім концентрачнім лаґері, выбудованым в селі Талергоф на выході од міста Ґрац в Австрії в роках 1914-1917. Лемко Союз, припоминать собі і павшых з карпатского реґіону в часі воєнных операцій в обох світовых войнах. Общество підкреслює і той факт, же по 2. світовій войні корінне русиньске обывательство было выкорчуване в результаті повоєнных діянь комуністів, а сама акція Вісла і концентрачный лаґєр в Явожні были траґічны у своїх выслідкох про Русинів в Польщі.
(TASR)