Підпредседа влады про інвестіції і інформатізацію Ріхард Раші вчера на пресконференції в Братіславі спустив вызву під назвов Wifi про тебе. Через вызву можуть словацькы села і міста, з вынятком Братіславского краю, жадати о дотацію 15 тісяч евр на будованя приступовых пунктів на пошырьованя wifi в рамках публічных просторів. Подля Рашіго то може підняти якость жывота жытелів у словацькых містах і селах. „Іде нам о то, жебы якостный інтернет, котрый в днешній добі піднимать якость жывота, а много раз є єдным із факторів, про котрый люди рішають, ці в селі зістати жыти, жебы быв приступный про вшыткых і не хочеме допустити, жебы нашы села зістали без можливости мати безплатны wifi зоны і в публічных просторах, што може помочі і розвитку турізму на селах,“ повів підпредседа влады. На проєкт є алокованых 10 міліонів евр. Сполуфінанцованя села або міста є 5 процент. Вызва із Операчного проґраму Інтеґрована інфраштруктура є встановлена про 800 міст і сел, перше оціньованя проєктів буде 13-го новембра.
(Медвідь, TASR)