Міністер справодливости Ґабор Ґал занедовго представить тзв. екзекучну амнестію. Піде о заставлїня амнестій, котры суть старшы як пять років. Ознамив то шеф резорту по засїданю влады. Міморядне опатрїня бы ся мало окрем штантых і верейноправных поглядавок дотуляти і приватных поглядавок. Самых довгів ся люде не збавлять але опатрїня облегчіть суды. З нецїлых двох міліонів екзекуцій бы подля Ґала могла убыти аж половина – міліон списів. Міністер інформовав, же в коаліції ся уже добісїдовали о вопросї екзекучной амнестії: „Зужыли сьме то на єдну верзію, теперь дописуєме доводову справу а іде то до меджірезортного припомінкового конаня, іде то нормалнї леґіслатівныхм процесом дале. Екзекуції старшы як пять років будуть заставлены, буде там дакілько вынятків, як выжывне або негнутелности, просто є там ряд вынятків а другы котры мають веце як пять років, суть недобытны, так зо закона суть заставлены. Каждый буде мати можность назад подати на екзекучне конаня, кедь собі думать, же та ёго екзекуція може быти успішна, тому не браниме, тота поглядавка не заникне, але тримати старшы екзекуції як пять років ся не оплатить.“ В заключній фазї ся уважовало і о скуточній екзекучній амнестії, де бы ся окрем заставлїня екзекуції на судах люде збыли і свого довгу по заплачіню ёго части. Бісїда была в тім припадї о довгох к штату і ёго інштітуціям.