План під назвов „Комплексынй поступ про навернутя Словаків заместнаных в загранічю назад до Словакії“, на котрім сполупрацовало шість резортів а влада о нїм мала роковати в середу, ся не любить шефові словацькой діпломації Мірославови Лайчакови, зато пожадав премєра Петра Пеллеґрініго, жебы о нїм міністры не роковали. „Выядрив єм пересвідчіня, же резорты к тому приступили барз формалнї. Опросив єм ся председу влады, ці їм іде о формалне приятя матеріалу або о вытворїня проґраму, котрый буде мотівовати людей к навернутю ся. Премєр потім розгоднув, же рокованя о матеріалї перерушиме а сядеме собі ід тому серіознї. Наша придана годнота є в двох бодох. По перше а то є уже і в тім матеріалї сьме змоніторовали як рїшать тоту тему іншы штаты. То значіть, же мы можеме принести моделы, котры ся освідчіли в іншых країнах а по друге самособов тот наш словацькый модел, кедь ту уже раз буде, буде кредібілный, так наша задача буде, жебы о нїм Словаци в загранічу знали. Але самособов тоты условія мусять быти вытворены дома а тоты мусять вытворити вшыткы резорты,“ увів Лайчак. Подля первістного матеріалу хоче Словакія притягнути своїх жытелїв, котры роблять за граніцями главно пропаґованём Інтернетового супроводника торгом роботы і інформачных матеріалів. Продовжовати має і Підпорна схема на навернутя одборників із заграніча і проєкт „Верний ся до Словакії“. В матеріалї тоже окремы резорты уваджають опатрїня, котры подля них злїпшують условія про людей, котры роблять в Словакії а могли бы мотівовати і Словаків за граніцями.
(TASR)