Проглубованя уж існуючой сполупраці і надвязаня новых области меджі членскыма штатами Европской унії з централной і выходной Европы быв ціль Фора регіонів Ініціятивы Трьох морї, котра ся одбыла в Ясовкі під патронатом презідента Поландії Анджея Дуду. Ініціятіва Трьох морї є кооперачна платформа 12-ьох країн Европской унії, котры ся находять меджі Балтскым, Ядранскым і Чорным морьом. Єй цільом є посилнити сполупрацю середньоевропскых штатів в енергетиці, діґіталізації і транспортній інфраштруктурі. Єднов з найвецей дискутованых тем меджінародной конференції быв проєкт Вія Карпатія. Выбудованя меджінародного транспортного корідору і перепоїнь семых країн є моделовым прикладом сполупраці меджі штатами – Інціятивы трьох морї вєдно із Словакійов а конкретні Пряшівскым самосправным крайом. ,,Цілково іде о 120 кілометрів доріг в Пряшівскім самосправнім краю. Ключовым про будованя Вія Карпатії є доріжне перепоїня меджінародной дорогы Р4. З вынятком преложкы дорогы у Свиднику суть трасы по Капушаны перед реалізаційов з предпокладаным зачатком выставбы по року 2020. Довго очікуваный про наше крайске місто є северный обхват, де бы ся мало зачати з будованям І. етапы, і зачатый є югозападный обхват, ,, повів председа ПСК Мілан Маєрскый, котрый быв участным даного фора.
(TASR)