Коло 150 вірників у суботу 26-го мая в ареалі деревяной Церькви св. Николая в Руській Быстрій брало участь на архієрейскій літурґії, котру із нагоды 10-ой річніві записаня того храму меджі културны памяткы UNESCO служыв кошыцькый єпарха Мілан Хаутур. Літурґія одбыла ся коло храму, в природі, котра підреслила красу културной дідовизны. На літурґії брали участь окрім домашніх і священици навколишніх парохій, но і гості з містной самосправы, представителі обчасньского здружіня Košice Región Turizmus, котре співпрацує з Кошыцькым самосправным крайом на проєкті презентації і пропаґації културных цінностей в кошыцькім краї реґістрованых в UNESCO. Участны были і проректоры Пряшівской універзіты і Універзіты ветерінарьного лікарьства і фармації в Кошыцях.
(Медвідь)