В Ублі оправили ходник, котрый хотять потягнути аж ку україньскій граніці. Задум проєкту Ходник приятельства выникнув влони прямо на гранічнім переході з Українов почас Дня приятельства і добросусідства. Оправленый ходник в Ублі отворять і дадуть до ходу зачатком будучого тыждня за участи партнерів. На проєкті співпрацовали з Пардубіцькым і Пряшівскым самосправным крайом. Iнвестіцію за 60 000 eвр підпорили краї єднакым ділом. Ходник в поній мірі хоснують як домашні Ублянці, так і турісты. Подля слов старосткы села Надєжды Сірковой, хотіли бы поставити іщі кілометер нового ходника прямо ку гранічному переходу, но проблемом суть пінязі. Може їм ку тому припоможе уж будучій День приятельства і добросусідства, на котрім ся зыйдуть представителі самосправ, подникателі, орґанізації і навщівници уж 26-го мая на словацько-україньскій граніці Вышнє Німецьке – Ужгород. Подію готує Кошыцькый і Пряшівскый самосправный край вєдно з україньскыма партнерами.
(Korzár, А.Кузмякова)