Змлувы у вызві на еврофондовы підпоры інвестіцій до сотворьованя і розвитку несельскогосподарьскых діялностей будуть знова переоцінены. Повіла то вчера на бріфінґу підпредседкыня влады і міністерка сельского господарьства і розвитку Ґабріела Матечна. Про шкандалізацію з боку опозіції ся не рихтує одыйти з функції. „Односно того, жебы ся успокоїла сітуація, пожадала єм ґенералного директора Сельскогосподарьской платобной аґентуры, жебы іщі раз змлувы із року 2015 і підкроків 6.4 перевірив. Опублікуєме пунктове оцініня, жебы не дішло ку жадным похыбностям. До часу, покля тому так не буде, пожадала єм директора СПА, жебы заставив підписованя змлув з підкроку 6.4.,“ повіла міністерка. Матечна на бріфінґу повіла і то, же собі не знать предстаивити, жебы хтость із Ірландії ці Австрії так неґатівно бісідовав на свою країну як словацька опозіція, што є подля ньой неприпустне.
(TASR, Медвідь)