Сітуацію у Фонді на підпору културы народностных меншын в повязаню з медіалізаційов спорных оціньовань проєктів на розвиток ромской културы треба рішыти штонайскоріше і в співпраці з обчаньсков сполочностьов. В одкрытім писмі адресованім директорови фонду Норбертови Молнарови то жадать 44 представителів і підтримователів мімовладных орґанізацій, котры роблять в области културы ромской народностной меншыны. Тоты мають подля властных слов приготовлены і конкретны пропозіції. Кавзу выкликала статя порталу Aktuality.sk, в котрій ся писало, же в раді, котра рішала о перерозділіню грошей на окремы проєкты ромской меншыны, сиділи люди, якы самы проєкты подали і были їм приділены великы фінанції. Молнар уж минулый тыждень повів, же закон о фонді порушеный не быв, кідьже ся в такім припаді выжадує лем выголошіня о конфлікті інтересів члена комісії і наслідне не братя участи на оціньованю його проєкту. Ку темі хотять депутаты скликати і парламентный выбор про културу і медії.
(Медвідь, TASR)