Вчера ся в центрї Кошіць знову одбыло протестне згромаждїня Za slušné Slovensko. Подїя переходила без інцідентів а участь на нїй брало веце як 2000 людей. К акції ся вчера придали і фармарї з выходу Словакії, котры ся жалують, же суть вытискованы з властных фундошів орґанізованыма ґрупами. Їх протест супроводила колона десяток тракторів, котра перешла Кошіцами од містьской части Барца аж к центру міста. За протестуючіх фармарїв выступив Франтїшек Оравец, фармарь з Ґінёва при Кошіцях, котрый бісїдовав о тім, же силны ґрупы заберають землю од тых, котры на ню мають правный нарок і котры так мусять стояти перед натиском, выгрожованём і фізічныма утоками. „Жадаме, жебы фінанчны средства – дотації были выплачованы лем такым ужывателям землї, котры на ню знають перевказати правный тітул, ці уже на основі властницьтва, або правоплатной наёмной змлувы. На жаль, одколи сьме вступили до Европской унії, не є жаден штатный ани самосправный орґан, котрый бы контролёвав правны тітулы к фундошам. Ту є тота дїра і простор про шпекулантів, новодобу мафію, котра знає поберати фінанції Европского сполоченства без правного тітулу,“ повів про новинарїв Оравец. Кедь Подогосподарьска платобна аґентура або міністерство подогосподарства не приступлять к змінї, неспокійны фармарї ся подля нёго рихтують на протест і з тракторами од Мігалёвець аж до Братїславы.
(TASR, Цітрякова)

Фото: TASR/ F. Iván